رسائل حب

دي رسايل موبايل جاتلي و أنا مسافر في مهمة عمل لمدة 5 أيام في ليبيا و معاها تعليقاتي عليها – حبيت اشركم فيها – لأنها رسايل حب في شبكة الإحساس و الحنان

من ست البنات قبل الطيران بثلاث ساعات

ترجعلنا بالسلامة إن شاء الله و لعمورتي الصغننة و لينا يا رب دائما دوما أحس إنها بتحاوطنا كلنا بالحنان و الخوف الأخوي الجميل – بحب دايما و هي بتحاجي علينا

من ابيه الساعة 9.37 مساءا

حمد الله على سلامتك – ليبيا نورت – وحشتنا اوردي ( already ) ترجعلنا بكل سلامة ان شاء الله ياااااااااااااه الرسالة دي حكايتها حكاية ... زي كل رجل اعمال مهم ) طبعا بتريق لاني لا رجل اعمال و لا حاجة ) مسافر كام يوم شغلت التجوال و الرسالة دي جت و انا لسه في الطيارة ما لمستش ارض مطار طرابلس . بزمتكم ايه احلى و لا اسرع و لا اجمل من كده– كنت عاوز اقف في الطيارة و اقول لكل الركاب انا احسن منكم كلكم انا حد مستنيني يقولي حمد الله على السلامة بس في مصر . كنت مبسوط اوي ... عارفين احساس غريب في بلاد غريبة و فجأة تلاقي طوق نجاة يطمنك ... الرسالة دي عملت كده

من ابيه اول يوم الساعة 9.30 صباحا

Wishing you best of luck on the exhibition. Have a wonderful day انا صحيت على الرسالة دي ( لو كنت نمت اصلا ) بعد رحلة شاقة مليئة بكل المفاجآت من نوعية انتظار في المطار لمدة ثلاث ساعات بين الجوازات و انتظار السيارات اللي طلعت ميكروباز من ماركة اربعة ورا و بعدين سفر لمدة ثلاث ساعات و الوصول لفندق الكلوب الحسيني نجمة الا ربع و عدم وجود غرفة على الرغم من اني حاجز من قبلها بخماشر يوم و سكنت الساعة 6 الصبح ثم جت الرسالة دي ... كانت كانها بتقول ارمي يا واد ورا ظهرك صباحنا فل و تأثيرها ما قلوكوش – تحفة

من ست البنات الساعة 11.30 صباحا اول يوم

صباح الخير و حمد الله على السلامة و ترجع بالسلامة لبيتك و لينا و شد حيلك في المعرض اوي - جرعة تشجيعية هائلة - ناس على بعد 2000 كيلو متر و فارق توقيت ساعة و لكن قلوبهم حوليك - رهيبة ست البنات تحسسك ان ليها اكبر ايدين في الدنيا محاوطة بيها كل اللي بتحبهم في الله – ربنا يخليكي

من الملاك الساعة 4.30 العصر اول يوم

ممكن اقول لاخويا الغاليي اوي – الدنيا هنا مضلمة اوي في غيابك – وحشتنا اوي

اخر مرة كنت هعيط لما كنت بابوس ابني و انا مسافر – ملاكنا الجميل اصر اني اعيط ادام الناس في المعرض – هزتني الرسالة دي حاولت اتصل بالملاك معرفتش عشان اقولها و انتوا كمان من قبل ما اسيبكم و انتوا واحشيني يا احلى ناس و صحبة

من ست البنات الساعة 9 ليلا اول يو م

اخبارك ايه في بلاد القرود؟ يا رب تكون احسن ترجع لينا بالسلامة يا رب -كنت اتصلت بيها و قلتلها اني هعمل مذكرات الرحلة و اسميها رحلات محمود في بلاد القرود . واخدين بالكم من ترجع لينا بالسلامة كل مرة – عاوزة تزقك بكل حب عشان تقولك ارجع يا واد و حشتنا و كل مرة الاقي ترجعلنا بالسلامة كنت بشوفها و هي راكعة و بتدعي بذلك – يا ست البنات يا اجدع بنوتة في الدنيا

من الملاك 9.30 ليلا تاني يوم

انا بس بمسي يا زومل ( زميل يعني ) الخط مظلم اوي حتى مع الفلاشر – وحشتنا اوي

يا سيدي على الملايكة لما تسوق ميكروبزات – اصل انا و الملاك دايما بنتخيل اننا سواقين ميكروبازات على خط الالف مسكن مساكن – فكانت بتواسيني بان الخط مظلم – اه يا قلبي يا ني نفسه يتحد مع العقل و يشوف كلمة اقوي من بحبكم اوي بس للأسف مش لاقي

من ست البنات 8.30 مساءا تالت يوم

اخبار ليبيا ايه و النادي الليبي ايه يا رب تكون الامور اتحسنت

عارفين معكم لحظة بلحظة نتابع الاخبار و الانباء فتابعونا – ست البنات كده – مش بقولكم واخدة في حضنها و دايسة على الرابع اخواتها البنات و الولاد في الله

من ابيه 9.00 مساءا تالت يوم

حودة ازيك ؟ ممن تشوف البدر الجميل النهاردة . وحشتنا جدا -كله واخد باله من وحشتنا و ترجعلنا في الرسايل – الكل في واحد شامبو وبلسم – بجد الله على احنا دي – ملقتش زيها غير معاكم يا صحبة الجنة ان شاء الله . و شوف الاحساس لما يكون عالي عند انسان و يشوف البدر و يعجب بيه و شوفوا المرحلة اللي بعد الاحساس العالي و اسمها حب ان كل اللي يحبهم يحسوا باللي حاسس بيه و يبعت رسالة و ما يبخلش على اللي بيحيه بالجمال عشان هيشوفه اجمل معاه – اه يا ابيه لو تعرف انك انت البدر مش اللي في السما

من اسمر النيل 3.49 ظهرا رابع يوم

Can not find Egypt air Tripoli from vodaphone I will try with Egypt air1717

-يا عيني عليك يا سمارة طلبت منه نمرة فرع مصر للطيران في طرابلس عشان تأكيد الحجز بدل ما يتلغي – و كنت ناسي انه في دمياط بينقي عفشة عشان هيتجوز – شغل نفسه في وقت مينفعش يكون فيه غير انه يكون انسان اناني زي أي واحد طبيعي بينقي عفشه – لكن لانه مش طبيعي و لان وظيفتة في البطاقة اسعاد الاخرين سال مرة و اتنين و تلاتة – يا سمارة حياتنا من غيرك ناقصة الابتسامة – ربنا يخليك لينا

من ست البنات اخر يوم 3.20 الظهر

شد حيلك كام ساعة و تبقى في وسطنا بالسلامة ان شاء الله

-ياه يا ست البنات – حاسة بحيلي اللي انقطع و بتقولي اشده – حد يعرفكم و يحبكم و ما يشدش حيله – ازاي ؟؟؟؟؟؟!!!! انتوا سندي و ظهري اللي بستر نفسي من الايام و اللي فيها بيه – خدوا بالكم من وسطنا

من الملاك اخر يوم الساعة 10.30 مساءا

اقول حمد الله على السلامة ؟ مفيناش من غربة تاني

قبل ما اركب الطيارة بساعة من ليبيا – يا ملاكنا الجميل – الغربة مش السفر – الغربة زي ما قلتيها قبل كده مش عارفة افرح الا وسطيكم و لا احزن الا معاكم – كلمتها بعد الرسالة حسيت اني عاوز اقولها يا احلى ملاك في الدنيا انتوا بتقولوا وحشتنا و انا عاوز اقول الدنيا وحشة اوي من غيركم

من ابيه 1.10 الفجر اخر يوم

Nawart masr Nawart masr Nawart masr Nawart masr Nawart masr Nawart masr Nawart masr Nawart masr Nawart masr Welcome to Egyptian satellite channels

نفس الحركة بتاعة الوصول الى ليبيا بس طبعا لا تخلوا من الفكاهة بس بجد ما حسيتش اني نورتها الا لما رميت نفسي في حضن ابيه الساعة 3 الفجر في صالة 3 بمطار القاهرة كنت عاوز اقوله حضنك منور جوايا يا ابيه و مصر كلها منورة بحنانك لا و ايه كمان لقيتوا جايب عدد الدستور اللي ملحقتوش و انا في ليبيا . تفصيلة يمكن تكون صغيرة لكن حنينة اوي

من ست البنات 2.00 الفجر

نورت مصر يا ابو عمرو

-كانت صاحية و موصية ابيه اول ما انزل في المطار يبعتلها رسالة اني جيت عشان تسلم عليا – اه يا ست البنات رسالتك كانت الف ايد بيسلموا و الف بسمة بتقول حمد الله على السلامة . أسف على الاطالة و لكن تبقى كلمة

حروفنا تتكرر كل يوم

و لكن هل تتكرر مع الاشخاص

اشك في ذلك

فمن رويت عنهم و هناك اخرون

تجد حروفك معهم براقة سلسة تسبقك في خطها على الورق او الكمبيوتر

لان حبرها ليس عاديا

مدادها حبك لهم و حبهم لك

ربنا ما يحرمنيش منكم